བྱམས་ཆེན་ཆོས་རྗེ་ཤཱཀྱ་ཡེ་ཤེས་ནི་རྗེ་ཙོང་ཁ་པའི་དངོས་སློབ་གོང་མའི་ཏི་ཤྲིར་གྱུར་པའི་བླ་ཆེན་གཉིས་ཀྱི་གྲས་ཡིན་པ་དང་། ཁོང་ནི་ཚལ་གུང་ཐང་དུ་ཚལ་པའི་དཔོན་བརྒྱུད་ཀྱི་རིགས་སུ་རབ་བྱུང་དྲུག་པའི་ཤིང་རྟ༡༣༥༤ལོར་སྐུ་བལྟམས། གཞོན་ནུ་ཉིད་ནས་ཡི་གེ་འབྲི་ཀློག་སོགས་གསན་བསམ་མཛད། རབ་ཏུ་བྱུང་བའི་མཚན་ཀློག་ཤཱཀྱ་ཡེ་ཤེས་ཞེས་གསོལ། བླ་མ་མང་པོ་བསྟེན་ནས་གསུང་རབ་ལ་སྦྱང་བ་མཛད་དེ་མཁས་པར་གྱུར། ཁྱད་པར་རྗེ་ཙོང་ཁ་པ་བླམར་བསྟེན་ཞིང་བཀའ་ཆོས་གནང་བ་ཐམས་ཅད་ཐུགས་ལ་མངའ་བ་ཡིན། རྗེའི་གསོལ་འདྲེན་པ་གནང་། རྗེ་ཙོང་ཁ་པ་ལས་བསྙེན་པར་རྫོགས། མདོ་སྔགས་ཀྱི་གསུང་རབ་བདུན་པའི་ས་བྱི་༡༤༠༨ལོར་ཏ་མིང་རྒྱལ་པོས་རྗེ་ཙོང་ཁ་པ་གདན་དྲངས་པ་ཕེབས་མ་ཐུབ་སྟབས་བྱམས་ཆེན་ཆོས་རྗེ་སྐུ་ཚབ་ཏུ་གཏོང་གནང་མཛད་པ་ལྟར་གོང་མ་ཡུང་ལོ་(永乐)ཁྲི་ལོ་བཅུ་གཉིས་པ་ཤིང་རྟ་༡༤༡༤ལོའི་ཟླ་བཅུ་གཉིས་པའི་ཟླ་སྨད་དུ་དབུས་ནས་ཕེབས་རྡོག་ཐོན་ཏེ་ནན་ཅིན་དུ་ཕེབས་ནས་གོང་མའི་དགོངས་པ་ལྟར་རྒྱུད་སྡེའི་སྒྲུབ་མཆོད་འཛུགས་པ་དང་དགོན་སྡེ་འདེབས་པ་སོགས་ཞྭ་སེར་གྱི་བསྟན་ཁ་རྒྱ་ཆེར་སྤེལ་བར་མཛད་དེ་གོང་མ་ཡུང་ལོས་ཆོས་རྗེ་འདི་ཉིད་ལ་“ཐམས་ཅད་མཁྱེན་པ། བློ་གྲོས་ཆེན་པོ། ཀུན་གྱི་སྐྱོབ་པ། བྱམས་པ་ཆེནཔོ། ཡངས་པའི་རྒྱལ་ཁམས་ཐམས་ཅད་བདེ་བར་སྦྱོར་བ། ཀུན་གྱི་གཙུག་ཏུ་དབང་བསྐུར་བ། ནུབ་ཕྱོགས་ཀྱི་རྒྱལ་བའི་སྲས་པོ། སྐྱིད་པའི་རྒྱལ་སྲིད་མི་འགྱུར་བརྟན་པའི་བླ་མ་ཆེན་པོ། ཏཱ་ཀོའུ་ཤྲི་བྱམས་ཆེན་ཆོས་རྗེ”ཞེས་པའི་མཚན་དང་། གསེར་ནལག་ལས་གྲུབ་པའི་ཐམས་ཀ་དང་བཅས་ཕུལ་ཏེ་བསྟན་འཛིན་མཐའ་དག་གི་གཙུག་རྒྱན་དུ་མངའ་གསོལ། དེ་ནས་རི་བོ་རྩེ་ལྔར་བྱོན་ནས་བསྟན་འགྲོའི་དོན་རྒྱ་ཆེར་མཛད་དེ་མེ་སྤྲེལ་༡༤༡༦ལོར་བཀའ་འགྱུར་པར་ཕུད་བསྣམས་ནས་བོད་དུ་ཕྱིར་ཕེབས། ས་ཕག་༡༤༡༩ལོར་རྗེ་ཙོང་ཁ་པའི་བཀའ་ལྟར་སེ་ར་ཐེག་ཆེན་གླིང་ཕྱག་བཏབ་སྟེ་མཐུན་རྐྱེན་ཕལ་ཆེ་བ་ཕག་གྲུའི་བློན་པོ་སྣེའུ་རྫོང་པ་ནམ་མཁའ་བཟང་པོས་སྦྱར། དེ་རྗེས་སླར་ཡང་གོང་མས་སྤྱན་དྲངས་པ་ལྟར་ས་བྱ༡༤༢༩ལོར་རྒྱ་ནག་པེ་ཅིན་དུ་ཐེངས་གཉིས་པ་ཕེབས་ཏེ་ཆོས་སྡེ་འདེབས་པ་དང་ཆོས་སྐོར་སོགས་རྒྱ་ཆེར་མཛད། ཞོན་ཏེ（宣德）ལོ་དགུ་པ་ཤིང་སྟག་༡༤༣༤ལོར་སྐྱར་དུ་ཆོས་རྗེ་འདི་ཉིད་ལ་ཆོ་ལོ་དང་ཟང་ཟིང་གི་དངོས་པོ་མཐའ་ཡས་པ་ཕུལ་ཐོག པེ་ཅིན་ནས་བོད་དུ་ཕེབས་པའི་ལམ་བར་མཛོ་མོ་མཁར་དུ་དགུང་ལོ་གྱ་གཉིས་ལ་ཕེབས་པ་ཤིང་ཡོས་༡༤༣༥ལོའི་བོད་ཟླ་བཅུ་པའི་ཚེས་ཉེར་བཞི་ཉིན་སྐུ་འདས། དེ་ནས་བཟུང་བཞི་མཆོད་ཅེས་བོད་ཟླ་བཅུ་པའི་ཉེར་བཞིའི་དགོང་མོ་གླིང་མེ་སྤར་བའི་སྲོལ་དར།

Jamchen Chöje, founder of Sera monastery in 1419, 238 n. 1