(དགའ་ལྡན་ཁྲི་ཐོག་དོན་དྲུག་པ) སྡེ་དྲུག་ཧོ་ཐོག་ཐུའི་སྐུ་ཕྲེང་དང་པོ་ཡིན། འཁྲུངས་ཡུལ་རྒྱལ་རོང་རྒྱལ་ཁག་བཅོ་བརྒྱད་ཀྱི་ཡ་གྱལ་ལྕགས་ལ་རྒྱལ་པོའི་མངའ་ཁོངས་དར་རྩེ་མདོར་ཨ་ཀྱ་ཁ་པ་ཤིང་རྭ་ནང་པའི་ཁྱིམ་དུ་སྐུ་འཁྲུངས། དུད་ཚང་འདི་ལ་དུས་ཕྱིས་རྒྱ་མི་ཚོས་大炮杨家锅庄ཟེར། རབ་བྱུང་བཅུ་བཞི་པའི་ཆུ་གླང (༡༨༥༣) ལོར་དགའ་ལྡན་གྱི་ཁྲིར་ཕེབས་ཏེ་ཁྲི་ལོ་བདུན་རིང་གི་མཛད་སྒོ་རྣམས་ལེགས་པར་གྲུབ་ནས་ཟུར་བཞུགས་གནང་མུས་སུ་ཏཱ་ལའི་བླ་མ་སྐུ་ཕྲེང་བཅུ་གཉིས་པ་འཕྲིན་ལས་རྒྱ་མཚོའི་ཡོངས་འཛིན་དུ་ཕེབས། (༡༨༧༢) ལོར་སྲིད་སྐྱོང་སྡེ་དྲུག་རིན་པོ་ཆེ་ཉིད་ཀྱང་སྐུ་གཤེགས།

(དགའ་ལྡན་ཁྲི་ཐོག་དོན་དྲུག་པ)སྡེ་དྲུག་ཧོ་ཐོག་ཐུའི་སྐུ་ཕྲེང་དང་པོ་ཡིན། འཁྲུངས་ཡུལ་རྒྱལ་རོང་ཡིན་ཅིང་། འཁྲུངས་ལོ་གསལ་བ་མ་རྙེད། སྐུ་གཞོན་ནུའི་དུས་སུ་འབྲས་སྤུངས་བློ་གསལ་གླིང་རྒྱལ་རོང་ཁང་ཚན་དུ་ཆོས་ཞུགས་ཐོག་གཞུང་ཆེན་པོའི་སློབ་གཉེར་ལེགས་པར་གྲུབ་ནས་དགེ་བཤེས་ལྷ་རམས་པའི་མཚན་བཏགས་དང་དེ་ནས་རྒྱུད་སྨད་དུ་ཞུགས་ཏེ་གསང་སྔགས་ཀྱི་སློབ་གཉེར་དང་གསན་བཞེས་རྒྱ་ཆེར་མཛད། རིམ་བཞིན་བླ་མ་དབུ་མཛད་དང༌། མཁན་པོ། བྱང་རྩེ་ཆོས་རྗེ་བཅས་ཀྱི་ཁྲིར་ཕེབས། རབ་བྱུང་བཅུ་བཞི་པའི་ཆུ་གླང(༡༨༥༣)ལོར་དགའ་ལྡན་གྱི་ཁྲིར་ཕེབས་ཏེ་ཁྲི་ལོ་བདུན་རིང་གི་མཛད་སྒོ་རྣམས་ལེགས་པར་གྲུབ་ནས་ཟུར་བཞུགས་གནང་མུས་སུ་ཏཱ་ལའི་བླ་མ་སྐུ་ཕྲེང་བཅུ་གཉིས་པ་འཕྲིན་ལས་རྒྱ་མཚོའི་ཡོངས་འཛིན་དུ་ཕེབས། རབ་བྱུང་བཅུ་བཞི་པའི་ཤིང་བྱི(༡༨༦༤)ལོར་ཡོངས་འཛིན་ཁྲི་ཟུར་མཁྱེན་རབ་དབང་ཕྱུག་ལ་གནས་སྐབས་རིང་སྲིད་སྐྱོང་གི་ལས་དོན་གནང་རྒྱུའི་སྐོར་སོགས་བོད་བཞུགས་ཨན་བན་གྱིས་ཐག་གཅོད་བྱས་ཐོག གོང་མ་ཐུང་ཁྲི(同治)ལ་སྙན་ཞུ་ཕུལ་བ་བཞིན་རབ་བྱུང་བཅུ་བཞི་པའི་ཤིང་གླང(༡༨༦༥)ལོར་སྲིད་སྐྱོ་ངོ་མའི་ཆོ་ལོ་དང་སྦྲགས་བསྐོ་གཞག་གནང་དོན་ལྟར་ལོ་བདུན་རིང་སྲིད་སྐྱོང་གནང༌། ཞིང་ལོ་ངོ་དྲུག་སོང་བའི་ལྕགས་ལུག(༡༨༧༡)ལོར། སྤྱི་ཁྱབ་མཁན་པོ་དཔལ་ལྡན་དོན་གྲུབ་དང་བཤད་སྒྲ་བཀའ་བློན་ཚེ་རིང་དབང་ཕྱུག་མཉམ་འབྲེལ་ཐོག་བསླངས་པའི་དགའ་ལྡན་ཟིང་འཁྲུགས་ཟེར་བ་བྱུང༌། དེར་ས་གནས་སྲིད་གཞུང་གིས་དྲག་གནོན་བྱས་རྗེས། དེའི་ཕྱི་ལོར་སྲིད་སྐྱོང་སྡེ་དྲུག་རིན་པོ་ཆེ་ཉིད་ཀྱང་སྐུ་གཤེགས། དེ་རྗེས་སྐུ་ཕྲེང་རིམ་པར་བྱུང་བ་སྡེ་དྲུག་ཧོ་ཐོག་ཐུ་ཞུ་བ་དེ་ཡིན། ཁྲི་ཆེན་འདིའི་ལོ་རྒྱུས་སྐོར། འབྲེལ་ཡོད་བླ་མ་ཁག་གི་རྣམ་ཐར་ནས་ཟུར་ཙམ་ལས་མི་གསལ་ཞིང༌། དེ་མིན་ལོ་རྒྱུས་ཡིག་ཆ་གཞན་དག་མ་རྙེད།