རྗེ་འདི་ནི་བྱང་དུ་ཀྲེ་བའི་རིགས་སུ་སྤྱི་ལོའི་དུས་རབས་བཅུ་དྲུག་པའི་དཀྱིལ་ཙམ་དུ་འཁྲུངས། སྐུ་གཞོན་དུས་བཀྲ་ཤིས་ལྷུན་པོའི་ཐོས་བསམ་གླིང་དུ་ཆོས་ཞུགས་མཛད་ནས་གཞུང་ཆེན་བཀའ་པོད་ལྔ་ལ་གསན་བསམ་མཛད། དེ་རྗེས་དབུས་སུ་ཕེབས་ནས་ཕར་ཕྱིན་དང་། ཚད་མའི་སྐོར་སོགས་སེ་ར་རྗེ་བཙུན་པའི་དྲུང་དུ་གསན་པས་མཁས་པར་གྱུར། བྱང་པ་རབ་འབྱམས་པ་ཞེས་ཐུགས་རྒྱུད་འབྱོངས་པའི་ཚད་དུ་བྱེད ། དེ་ནས་ངམ་རིང་སྤང་འབུལ་གྲྭ་ཚང་གི་བཤད་ཉན་མཛད། སེ་ར་བྱེས་ཀྱི་བླ་མར་ཕེབས་ནས་འདུལ་བའི་སྤྱི་དོན་དང་། མཛོད་ཀྱི་སྤྱི་དོན། ཕར་ཕྱིན་སྤྱི་དོན་སོགས་ལེགས་བཤད་མང་དུ་བརྩམས། སྙན་པའི་གྲགས་པ་ཕྱོགས་མཐར་ཁྱབ། རྒྱལ་དབང་བསོད་ནམས་རྒྱ་མཚོས་སེ་རའི་ཁྲི་པར་ཕེབས་དགོས་གསུངས་ཀྱང་སྤྱན་མི་གསལ་བས་དགོངས་ཞུ་མཛད། འཁྲུངས་འདས་དང་མཛད་རྣམ་ཞིབ་པ་མ་རྙེད།

ཁོང་ནི་སྤྱི་ལོའི་དུས་རབས་བཅུ་དྲུག་པའི་དུས་དཀྱིལ་ཙམ་དུ་བྱང་ཀྲེ་བའི་རིགས་སུ་སྐུ་འཁྲུངས། ཁོང་དགུང་ལོ་གཞོན་ནུའི་དུས་ནས་བཀྲ་ཤིས་ལྷུན་པོའི་ཐོས་བསམ་གླིང་གི་ཆོས་སྒོར་ཞུགས་ཏེ་གཞུང་ཆེན་བཀའ་པོད་ལྔ་ལ་གསན་བསམ་མཛད། དེ་ནས་དབུས་སུ་ཕེབས་ཤིང་སེ་ར་རྗེ་བཙུན་ཆོས་ཀྱི་རྒྱལ་མཚན (1469—1544) སོགས་ལ་བསྟེན་ཏེ་ཕར་ཕྱིན་དང་། ཚད་མའི་སྐོར་བཅས་ལ་ཟབ་སྦྱོང་མཛད་[968]པས་མཁས་པ་ཆེན་པོར་གྱུར། བྱང་པ་རབ་འབྱམས་པ་ཞེས་ཐུགས་རྒྱུད་འབྱོངས་པའི་ཚད་དུ་བྱེད། དེ་ནས་ངམ་རིང་སྤང་འབུལ་གྲྭ་ཚང་གི་འཆད་ཉན་པ་མཛད། དེ་ནས་སེ་ར་བྱེས་པ་གྲྭ་ཚང་གི་བླ་མ་མཛད། རྒྱལ་བ་བསོད་ནམས་རྒྱ་མཚོས་སེ་ར་ཐེག་ཆེན་གླིང་གི་ཁྲི་པ་བཞུགས་དགོས་གསུངས་ཀྱང་སྤྱན་མི་གསལ་བ་སོགས་གསུངས་ནས་དགོངས་ཞུ་མཛད། ཁོང་གི་གསུང་རྩོམ་ནི《འདུལ་བའི་སྡེ་སྣོད་མཐའ་དག་གི་དགོངས་པ་ཕྱིན་ཅི་མ་ལོག་པར་འགྲེལ་པར་བྱེད་པའི་ལེགས་བཤད་བསྐལ་བཟང་ནོར་བུའི་ཕྲེང་བ》དང་། 《གཞི་སྟོད་ཀྱི་སྨད་ཆ》། 《མཛོད་ཀྱི་སྤྱི་དོན》། 《ཕར་ཕྱིན་སྤྱི་དོན》། 《རྗེ་བཙུན་ཆོས་ཀྱི་རྒྱལ་མཚན་དཔལ་བཟང་པོའི་རྣམ་ཐར་དངོས་གྲུབ་ཀྱི་ཆར་འབེབས》བཅས་པོད་གཅིག་བཞུགས་སོ། །