འཕགས་པ་བློ་གྲོས་རྒྱལ་མཚན་

འགྲོ་མགོན་ཆོས་རྒྱལ་འཕགས་པ་རབ་བྱུང་བཞི་པའི་ཤིང་ལུག (༡༢༣༥) ལོ་ནས་རབ་བྱུང་ལྔ་པའི་ལྕགས་འབྲུག་ (༡༢༨༠) ལོའི་བར། ཟངས་ཚ་བསོད་ནམས་རྒྱལ་མཚན་ལ་ལྕམ་ལྔ་ཡོད་པའི་ནང་གི་མ་གཅིག་ཀུན་དགའ་སྐྱིད་ཀྱི་སྲས་ཆེ་བ་ཡིན། ཡབ་དགུང་ལོ་ང་གཉིས་པ་ལ་འཁྲུངས། དགུང་ལོ་ཆུང་དུས་ནས་ཡི་གེ་འབྲི་ཀློག་སོགས་རིག་གནས་ལྔ་ལ་དཀའ་ཚེགས་ཆེན་པོ་མ་དགོས་པར་མཁྱེན། དགུང་ལོ་བརྒྱད་ལ་ཕེབས་དུས་ཆོས་བཤད་མཛད་ཐུབ་པ་བྱུང་། ཤིང་འབྲུག (༡༢༤༤) ལོར་དགུང་ལོ་བཅུར་ཕེབས་དུས་རང་ཉིད་ཀྱི་ཁུ་བོ་རྗེ་བཙུན་ས་སྐྱ་པཎྜི་ཏ་རྒྱལ་པོ་གོ་དན་གྱིས་གདན་དྲངས་པ་ལྟར་ཕེབས་སྐབས་ཕྱག་ཕྱིར་བྱོན། དགུང་ལོ་བཅུ་བདུན་པ་ལྕགས་ཕག (༡༢༥༡) ལོར་རྗེ་བཙུན་ས་སྐྱ་པཎྜི་ཏ་གཤེགས་ཁར་རང་ཉིད་ཀྱི་ཆོས་རྒྱུད་འཛིན་པའི་བདག་པོར་བསྐོས། (༡༢༧༠) ལོར་སླར་ཡང་རྒྱལ་པོས་གསང་སྔགས་ཀྱི་དབང་ཞུས་པའི་ཡོན་དུ། མི་ཉག་རྒྱལ་རྒོད་རྒྱལ་པོའི་ཤེས་དམ་ལ་བཅོས་བྱས་ནས་ཤེལ་དམ་གླིང་དྲུག་མ་དང་། གནམ་གྱི་འོག ས་ཡི་སྟེང་ན་རྒྱ་གར་ལྷའི་སྲས་པོ། སྤྲུལ་པའི་སངས་རྒྱས། ཡི་གེ་རྩོམ་མི། རྒྱལ་ཁམས་འཇགས་སུ་འཇུག་པ་པོ། གནས་ལྔ་རིག་པའི་པཎྜི་ཏ་འཕགས་པ་ཏི་ཤྲི་ཞེས་པའི་འཇའ་ས་དང་གོ་གནས། དངུལ་བྲེ་ཆེན་སྟོང་ཕྲག གོས་དར་ལྔ་ཁྲི་དགུ་སྟོང་སོགས་ཕུལ། དེ་ནས་བོད་དུ་ཕེབས་ཁར་གོང་མ་སེ་ཆེན་ཧན་གྱིས་དངོས་འབུལ་རྒྱ་ཆེན་པོ་དང་བཅས་བཞུགས་པར་ཞུས་ཀྱང་མ་གསན་པར་ཕྱིར་ཕེབས་རྒྱལ་པོས་དཔོན་དམག་ཁྲི་ཕྲག་མང་པོའི་དཔུང་དང་བཅས་ཏེ་ཟླ་བ་མང་པོའི་བར་དུ་སྲུང་སྐྱེལ་ཞུས་ཤིང་། རབ་བྱུང་ལྔ་པའི་མེ་བྱི་ (༡༢༧༦) ལོར་ས་སྐྱར་ཕྱག་ཕེབས། ལོ་དེར་གཙང་ཆུ་མིག་རིང་མོར་དགེ་འདུན་ཁྲི་བདུན་ལྷག་ལོངས་པ་ལ་ཆོས་འཁོར་གནང་བ་དེ་ལ་ཆུ་མིག་ཆོས་འཁོར་ཟེར། དེ་ནས་ལོ་ངོ་ལྔའི་བར་ས་སྐྱའི་གདན་ས་གནང་ནས་དགུང་ལོ་ཞེ་དྲུག་པ་ལ་ལྷ་ཁང་བླ་བྲང་དུ་སྐུ་གཤེགས།