grags pa rgyal mtshan

Jetsün Drakpa Gyaltsen, son of Kunga Nyingpo: 1147-1216. One of the Five Sakya Forefathers

[911] གྲགས་པ་རྒྱལ་མཚན་གྱི་ཞེ་མིང། ...

རབ་བྱུང་གསུམ་པའི་མེ་ཡོས(༡༡༤༧)ལོར་འཁྲུངས། རྗེ་བཙུན་བསོད་ནམས་རྩེ་མོའི་གཅུང་པོ་ཡིན། ཡབ་ས་ཆེན་ཀུན་དགའ་སྙིང་པོ་དགུང་ལོ་ང་དྲུག་བཞེས་པའི་དུས་སུ་འཁྲུངས། དགུང་ལོ་བརྒྱད་ནས་བཅུ་གཉིས་བར་དུ་ཡབ་ཀྱི་དྲུང་དུ་གསན་སྐྱོང་གནང་། དགུང་ལོ་བཅུ་གཉིས་པ་ལ་ཡབ་གཤེགས་ནས་བཅུ་གསུམ་པ་ལ་གཅེན་སློབ་དཔོན་བསོད་ནམས་རྩེ་མོས་གདན་སར་བསྐོས། དེ་ནས་དགུང་ལོ་བདུན་ཅུ་ཐམ་པ་བར་ལོ་ངོ་ལྔ་བཅུ་ང་བདུན་རིང་གདན་ས་མཛད། དབུ་རྩེ་སྙིང་མའི་གཙུག་ལག་ཁང་དང་། གསེར་བྲིས་ཀྱི་བཀའ་འགྱུར་བཞེངས། གཞན་གྱིས་ཕུལ་བའི་དངོས་པོ་གང་བྱུང་ཡང་རྟེན་བཞེངས་དང་མཆོད་འབུལ། དབུལ་ཕོངས་ལ་སྦྱིན་གཏོང་སོགས་ཆོས་ཕྱོགས་ཀྱི་བྱ་བ་ཁོ་ནར་གཏོང་བར་མཛད་པས་སྐུ་གཤེགས་སྐབས་གདན་དང་ན་བཟའ་ཆ་ཚང་གཅིག་མ་གཏོགས་དངོས་པོ་གང་ཡང་མ་ལུས་པར་མཛད། དགུང་ལོ་བདུན་ཅུ་པ་རབ་བྱུང་བཞི་པའི་མེ་བྱི(༡༢༡༦)ལོར་སྐུ་གཤེགས། གསུང་རྩོམ་རྣམས་ཕྱོགས་བསྒྲིགས་བྱས་པའི་པོད་བཞི་སྡེ་དགེ་དཔར་ཁང་དུ་དཔར་ཡོད། རྣམ་ཐར་ལོ་རྒྱུས་རྒྱས་པ་བདག་ཆེན་ཨ་མྱེས་ཞབས་ཀྱིས་མཛད་པའི《ས་སྐྱའི་གདུང་རབས་རིན་ཆེན་བང་མཛོད》ཀྱི་ཤོག་གྲངས༣༧ནས༤༦བར་གསལ།

ཁོང་ནི་རབ་བྱུང་གསུམ་པའི་མེ་མོ་ཡོས་ལོ་སྟེ་སྤྱི་ལོ 1147 ལོར་དཔལ་ལྡན་ས་སྐྱར་ཡབ་ས་ཆེན་ཀུན་དགའ་སྙིང་པོ་དང་། ཡུམ་མ་གཅིག་འོད་སྒྲོན་གཉིས་ཀྱི་སྲས་སུ་སྐུ་འཁྲུངས། རབ་བྱུང་བཞི་པའི་མེ་ཕོ་བྱི་ལོ་སྟེ་སྤྱི་ལོ 1216 ལོར་སྐུ་གཤེགས། དགུང་ལོ་བརྒྱད་པར་བྱང་སེམས་ཟླ་བ་རྒྱལ་མཚན་ལས་དགེ་བསྙེན་གྱི་སྡོམ་པ་བཞེས། ཚོགས་འཁོར་གྱི་དུས་མ་གཏོགས་ཐ་མལ་དུ་ཤ་ཆང་ཞལ་ལ་མི་རེག་གསུངས། དགུང་ལོ་བཅུ་པར་སྡོམ་པ་ཉི་ཤུ་པ་དང་། སྒྲུབ་ཐབས་མཚོ་སྐྱེས་ལ་སོགས་པ་དུ་མ་གསན་ཞིང་ལེགས་པར་མཁྱེན། དགུང་ལོ་བཅུ་གཅིག་པར་སློབ་དཔོན་རྣམས་ཀྱི་གཙོས་མཁས་མང་དབུས་སུ་གཞུང་དོན་ཐུགས་ལས་གསུངས་པས་ཐམས་ཅད་ངོ་མཚར་སྐྱེས་ཏེ་མཚན་ལ་བློ་གྲོས་ཆེན་པོ་ཞེས་གསོལ། དགུང་ལོ་བཅུ་གཉིས་པར་ཡབ་ས་ཆེན་སྐུ་གཤེགས་ནས་འདས་མཆོད་རྒྱ་ཆེན་པོར་མཛད། དགུང་ལོ་བཅུ་གསུམ་པར་གཅེན་པོ་སློབ་དཔོན་བསོད་ནམས་རྩེ་མོས་ས་སྐྱའི་གདན་སར་བཀོད། ཆོས་འཆད་སྐབས་གཞན་གྱིས་བརྩད་ཅིང་དྲིས་པ་ན་ཆོས་དང་མཐུན་པའི་ལན་འདེབས་པ་ནི་སྤོབས་པ་ཐོགས་པ་མི་མངའ་བར་ལུང་དང་རིགས་པས་ཕ་རོལ་གྱི་ལོག་རྟོག་སེལ་བ་ལ་རྟོག་གེ་པ་ཆེན་པོ་སྒྲ་ཡི་ཆ་ལ་མ་རྨོངས་པ་དག་ཀྱང་ངོ་མཚར་སྐྱེ་བ་ཞིག་གྱུར། [659] གྲུབ་པའི་མཚན་མ་མངོན་སུམ་དུ་བརྙེས་པས་ཁ་ཆེ་པཎ་ཆེན་གྱིས་ཉི་མ་གཟའ་འཛིན་ཡོད་པར་དུས་བཏབ་པར་ཁོང་གིས་གཟའ་འཛིན་མེད་པར་བསྒྱུར་བར་མཛད་པས། ཁ་ཆེ་པཎ་ཆེན་གྱིས་ཁོང་གསང་བ་འདུས་པའི་དཀྱིལ་འཁོར་དུ་གཟིགས་ཏེ་མ་ཧཱ་བཛྲ་དངོས་སུ་འདུག་ཅེས་བསྔགས་པར་མཛད། ཁོང་གིས་དབུ་རྩེ་རྙིང་མའི་གཙུག་ལག་ཁང་དང་། གསེར་བྲིས་ཀྱི་བཀའ་འགྱུར་བཞེངས། གཞན་གྱིས་ཕུལ་བའི་དངོས་པོ་གང་བྱུང་ཡང་རྟེན་བཞེངས་དང་། མཆོད་འབུལ། དབུལ་ཕོངས་ལ་སྦྱིན་པ་གཏོང་བ་སོགས་ཆོས་ཕྱོགས་ཀྱི་བྱ་བ་ཁོ་ནར་གཏོང་བར་མཛད་པས། སྐུ་གཤེགས་སྐབས་གདན་དང་། ན་བཟའ་ཆ་ཚང་གཅིག་མ་གཏོགས་དངོས་པོ་གང་ཡང་མ་ལུས་པར་མཛད། ཁོང་ནི་ས་སྐྱ་གོང་མ་རྣམ་ལྔའི་ནང་གི་གསུམ་པ་ཡིན། ཁོང་གི་སློབ་མའི་ཐུགས་སྲས་གཙོ་བོ་ས་པཎ་ཀུན་དགའ་རྒྱལ་མཚན་ཡིན། ཁོང་གི་གསུང་རྩོམ་ནི《བླ་མ་རྒྱ་གར་བའི་ལོ་རྒྱུས》དང་། 《ཆོས་སྤྱོད་རིན་ཆེན་ཕྲེང་བ》། 《ཞེན་པ་བཞི་བྲལ་གྱི་གདམས་པ》བཅས་པོད་བཞི་བཞུགས་སོ། །

གྲགས་པ་རྒྱལ་མཚན་གྱི་ཞེ་མིང༌།